Nitaendelea kuwa Mwanachama hai wa Simba - Try Again

Uamuzi wa Kaimu Rais wa Simba Salim Abdallah 'Try Again' wa kutogombea nafasi ya Uwenyekiti wa Bodi ya Wakurugenzi ya Simba kwenye uchaguzi Mkuu utakaofanyika Novemba 03 mwaka huu, umewasononesha wengi.

Try Again ameiongoza Simba kwa mafanikio makubwa tangu alipokaimu nafasi ya aliyekuwa Rais wa klabu hiyo Evans Aveva na Makamu wake Godfrey Nyange Kaburu ambao walishitakiwa Mahakamani kwa kesi ya kuhujumu uchumi.

WanaSimba wengi walitarajia angechukua fomu na hakuna shaka angeweza kushinda kwa kishindo.

Hata hivyo mwenyewe aliamua kutogombea nafasi hiyo kuepusha mgongano wa kimaslahi.

Mwenyewe ameona ni vyema akakaa pembeni hasa baada ya kuiongoza Simba kufanya mabadiliko ya mfumo wa uendeshaji.

Amefafanua kwamba amechukua uamuzi huo ili isije ikatafsiriwa kuwa alikuwa akijitengenezea njia ya kuendelea kubaki madarakani baada ya mafanikio hayo aliyoyapata katika kipindi kifupi cha uongozi wake.

Try Again amesema kutokuwepo kwake kwenye uongozi hakuna maana kuwa hatashirikiana na viongozi watakaochaguliwa.

Amesema ataendelea kubaki akiwa Mwanachama hai wa klabu ya Simba.