Jumanne Oktoba 20 Simba itashuka uwanja wa Uhuru kuikabili 15 de Agosto katika mchezo wa mkondo wa kwanza kuwania tiketi ya kufuzu hatua ya makundi ya michuano ya ligi ya mabingwa barani Afrika (CAFCL).
Mtanange huo wa kwanza kati ya mechi mbili za kuamua timu ya kutinga makundi, utapigwa saa 10 jioni.
Hii itakuwa mara ya kwanza kwa Simba kucheza dhidi ya mabingwa hao wa Guinea ya Ikweta lakini kwa kocha Steve Barker haitakuwa mara ya kwanza.
Msimu uliopita Barker wakati anainoa Stellenbosch kabla ya kutua Msimbazi, alikutana na de Agosto kwenye michuano ya kombe la Shirikisho (CAFCC) katika hatua kama hii ya raundi ya pili ya kuwania tiketi ya kutinga makundi.
Mchezo wa kwanza uliopigwa Afrika Kusini Stellenbosch waliibuka na ushindi wa mabao 4-1 huku mechi ya marudiano ugenini mchezo ukimalizika kwa suluhu ya bila kufungana na hivyo Stellenbosch kutinga makundi.
Wakati huu Barker anakutana tena na timu hiyo lakini sasa akiwa na Simba kwenye ligi ya mabingwa huku mechi zote mbili zikipigwa uwanja wa Uhuru.
Barker amesema de Agosto ni timu ambayo taarifa zake sio nyingi hivyo wanapaswa kwenda kuwakabili kwa tahadhari kubwa pamoja na kuwa wana faida ya kucheza mechi zote mbili nyumbani.
