Kocha wa Simba, Steve Barker, ameonyesha kuridhishwa na uwezo wa Yusuph Kagoma kucheza nafasi tofauti uwanjani, akifungua uwezekano wa kuendelea kumtumia kiungo huyo kama beki wa kati pale mahitaji ya kikosi yatakapolazimu.
Uamuzi wa Barker kumhamishia Kagoma katika eneo la ulinzi wa kati ulionekana katika ushindi mnono wa mabao 6-1 ambao Simba iliupata dhidi ya Mashujaa ya Kigoma, Jumanne iliyopita, kwenye Uwanja wa Uhuru jijini Dar es Salaam.
Katika mchezo huo, Kagoma alishirikiana na Ismail Toure kuimarisha ukuta wa ulinzi, akitekeleza jukumu ambalo si la kawaida kwake, kwani amezoeleka zaidi kucheza eneo la kiungo.
Hatua hiyo ilichangiwa na kutokuwepo kwa beki Rushine De Reuck, ambaye kwa mujibu wa taarifa zilizotolewa anakabiliwa na changamoto za kifamilia. Hata hivyo, Barker aliamua kutumia rasilimali alizonazo ndani ya kikosi badala ya kuruhusu upungufu wa wachezaji kuwa kikwazo.
Barker: Wachezaji wawe tayari kwa majukumu mapya
Barker ameeleza kuwa kuwa na wachezaji wenye uwezo wa kucheza nafasi zaidi ya moja ni faida kubwa kwa timu, hasa katika kipindi ambacho kikosi kinaweza kukumbwa na majeraha, kutokuwepo kwa wachezaji au changamoto nyingine zinazoathiri uteuzi.
Kocha huyo amesema amekuwa akiwahimiza wachezaji wake kuwa tayari kukabiliana na majukumu tofauti kulingana na mahitaji ya timu.
“Ni faida kuwa na mchezaji kama Kagoma. Wakati mwingine mnaweza kupoteza wachezaji kutokana na sababu mbalimbali, hivyo ni vizuri. Siku zote nimekuwa nikiwaambia wachezaji kwamba unatakiwa kuwa tayari kwa majukumu tofauti,” alisema Barker.
Kwa upande wake, Kagoma ameonyesha kuwa hana tatizo kupewa jukumu jipya, akibainisha kuwa uzoefu wake wa kucheza nafasi tofauti umemjengea utayari wa kutekeleza maelekezo ya benchi la ufundi.
Kiungo huyo amesema anamudu kucheza kama kiungo mkabaji, kiungo wa kati na hata beki wa kulia, hivyo kuhamishiwa katika eneo la ulinzi wa kati si jambo analolichukulia kama kikwazo.
“Nafasi ambazo nimewahi kucheza, nafikiri hata beki wa kulia nishawahi kucheza, namba sita na namba nane. Maisha kokote,” alisema Kagoma.
