Wekundu wa Msimbazi Simba SC, wamezidi kujiimarisha kileleni mwa msimamo wa ligi wakishusha kichapo cha mbwa mwizi kwa Mashujaa FC cha mabao 6-1 katika mchezo wa Ligi Kuu ya NBC uliopigwa leo kwenye Uwanja wa Uhuru jijini Dar es Salaam.
Kipigo hicho ni cha pili Simba inatembeza uwanja wa Uhuru baada ya kuibwaga Yanga SC mabao 2-1 kwenye Dabi ya Kariakoo mchezo uliopita, matokeo yanayothibitisha kuwa Wekundu wa Msimbazi kwa sasa wako kwenye kiwango bora zaidi msimu huu chini ya kocha Steve Barker.
Mvua ya mabao ya Simba ilianza mapema dakika ya 16 kupitia kwa winga machachari Libasse Gueye, kabla ya Elie Mpanzu kuongeza goli la pili katika dakika ya 33 na kuipeleka Simba mapumziko ikiwa mbele kwa mabao 2-0.
Kipindi cha pili kilianza kwa kasi huku Simba wakionekana kuwa na njaa zaidi ya mabao. Kiungo mshambuliaji Anicet Oura alipachika goli la tatu dakika ya 53, akifuatiwa tena na Elie Mpanzu aliyekamilisha mabao mawili (brace) mnamo dakika ya 58.
Mashujaa FC walijaribu kujinasua kutoka kwenye kamba za Simba na kufanikiwa kupata goli la kufutia machozi dakika ya 64 kupitia kwa mshambuliaji wao Selemani Bwenzi.
Hata hivyo, shangwe hizo za Mashujaa zilidumu kwa muda mfupi kwani kiungo Morice Abraham alizama wavuni dakika ya 61 na beki kisiki Ismael Olivier Toure akahitimisha karamu hiyo ya mabao kwa goli la sita dakika ya 68.
Kwa ushindi huu, Simba SC imejikita thabiti kileleni mwa msimamo wa Ligi Kuu ya NBC baada ya kufikisha alama 24, ikiwa imeshinda mechi zote nane (8) ilizocheza msimu huu, huku ikionyesha soka safi la kuvutia.
