Wekundu wa Msimbazi, Simba Sc leo watashuka dimba la Uhuru jijini Dar es salaam kuwakabili watani zao Yanga katika mchezo wa ligi kuu ya NBC.
Mtanange huo unatarajiwa kupigwa saa 1 usiku, Simba ikiwa mwenyeji wa mchezo huo.
Ni matokeo ya aina moja tu ambayo Mnyama anahitaji leo, USHINDI ili kupanda kileleni mwa msimamo wa ligi.
Simba ina sababu nyingi za kuhitaji ushindi kwenye mchezo huo lakini kubwa zaidi ni kujiweka katika nafasi nzuri kwenye mbio za kuwania ubingwa msimu huu.
Sifa kuu ya kuwa bingwa kwenye ligi lazima uchukue alama dhidi ya wapinzani wako wakuu. Tayari Mnyama amechukua alama tatu dhidi ya Azam Fc na sasa anazihitaji alama tatu dhidi ya mpinzani wake mkuu Yanga.
Lakini pia leo Simba itashuka uwanja wa Uhuru ikiwa na lengo la kufuta rekodi mbaya ya kukosa ushindi dhidi ya Yanga kwenye mechi za ligi kuu.
Katika misimu minne, Simba imeshinda mchezo mmoja tu dhidi ya Yanga kwenye ligi. Hii ni rekodi mbaya ambayo sasa inapaswa kufika mwisho.
Kwa Simba kuendelea kukosa matokeo mazuri dhidi ya Yanga sio tu inasababisha jambo hilo kuzoeleka, lakini pia ni moja ya sababu iliyopelekea Simba kukosa ubingwa katika kipindi chote ambacho mpinzani wake ametawala.
Mkufunzi wa Simba Steve Barker amesema amekiandaa kikosi chake vyema matarajio yake ni wachezaji kwenda kufanya kile walichokiandaa kwenye uwanja wa mazoezi akiwa na matumaini makubwa ya kuibuka na ushindi.
Barker alikiri mchezo hautakuwa mwepesi kwa sababu wapinzani wao Yanga nao wana ubora katika baadhi ya maeneo hivyo watawakabili kwa kuzingatia mpango waliouandaa huku wakitumia madhaifu yao kuwaadhibu.
Mtanange huo unatarajiwa kupigwa kuanzia saa 1 usiku.
Kila la kheri Simba, kila la kheri Mnyama.. Kila la kheri Wekundu wa Msimbazi...!
