Bodi ya Ligi Kuu Tanzania (TPLB) imeimarisha hatua za kuhakikisha usalama wa vyumba vya kubadilishia nguo za wachezaji kwa kusisitiza matumizi ya vifaa maalumu vya kupima ubora wa hewa vinavyojulikana kama Gas Detectors wakati wa mechi za Ligi Kuu Tanzania Bara.
Kupitia taarifa yake kwa umma iliyotolewa Oktoba 9, 2026, TPLB imeeleza kuwa vifaa hivyo vitatumika kukagua vyumba vya kubadilishia nguo ili kuhakikisha mazingira yanakuwa salama kwa wachezaji, benchi la ufundi na maafisa wa timu.
Kwa mujibu wa taarifa hiyo, ukaguzi utaanza mara baada ya vyumba vya kubadilishia nguo kukabidhiwa kwa timu husika na utaendelea hadi mchezo utakapokamilika. Lengo ni kubaini uwepo wa gesi au hali isiyo ya kawaida ya hewa inayoweza kuhatarisha afya na usalama wa watumiaji wa vyumba hivyo.
Vifaa hivyo vimeanza kutumika
TPLB imesema matumizi ya vifaa hivyo yalianza Oktoba 8, 2026, ikiwa ni sehemu ya utaratibu wa kiusalama unaotekelezwa katika viwanja vyote nchini vinavyotumika kwa michezo ya ligi.
Hatua hiyo inalenga kuhakikisha vyumba vya kubadilishia nguo vinakuwa na mazingira yanayofaa kwa matumizi ya timu kabla, wakati na baada ya michezo, huku afya na usalama wa wachezaji vikipewa kipaumbele.
Bodi hiyo imesisitiza kuwa itaendelea kushirikiana na wadau mbalimbali wa soka nchini kuhakikisha mechi za Ligi Kuu Tanzania Bara zinafanyika katika mazingira salama, kwa kuzingatia taratibu na viwango vya usalama vinavyotakiwa.
Utekelezaji wa utaratibu huo ni sehemu ya juhudi za kuimarisha usimamizi wa usalama viwanjani na kulinda afya za wachezaji, benchi la ufundi pamoja na maafisa wengine wa timu.
