Meneja wa Habari na Mawasiliano wa klabu ya Simba Ahmed Ali amewahakikishia mashabiki wa timu hiyo kuwa wamejipanga vyema kwa mchezo wa ligi kuu dhidi ya Yanga utakaopigwa Jumamosi, Oktoba 10 kwenye uwanja wa Uhuru.
Ahmed amesema baada ya kikosi kurejea nchini wakitoka Afrika Kusini ambako walikamilisha kambi ya siku 10, timu inatarajiwa kurejea mazoezini leo wakiingia kambini moja kwa moja kukamilisha maandalizi ya mchezo huo.
Ahmed amesema wachezaji wana ari na morali kubwa kila mmoja akiwa na shauku kubwa ya mchezo huo
"Wachezaji wanautazama mchezo huu kwa jisho la matamanio makubwa, kitendo cha kuwapeleka nje ya nchi kuweka kambi huo ni ujumbe kuonyesha kwa kiasi gani tumedhamiria kufanya vizuri kwenye mchezo huu pamoja na mechi nyingine zinazokuja"
"Morali ya wachezaji iko juu, ligi tumeanza vizuri bila kupoteza wala sare hivyo tunataka kuendeleza mwenendo huo kwa kupata ushindi kwenye kila mechi."
"Simba dhidi ya Yanga ni mechi ya kimaamuzi, hii ni mechi ambayo unakwenda kupata ubora halisi wa timu yako. Kipimo cha usajili na maandalizi tuliyofanya ni katika mchezo huu Jumamosi Oktoba 10"
"Mashabiki wa Simba waje uwanjani kwa wingi, maandalizi yamekwenda vizuri na kila kitu kiko sawa," alisema Ahmed.
