Baada ya kurejea kutoka Afrika Kusini, kikosi cha Simba kinatarajiwa kuingia kambini kwa ajili ya maandalizi ya mwisho kuelekea mchezo wa ligi kuu dhidi ya Yanga utakaopigwa Jumamosi, Oktoba 10 kwenye uwanja wa Uhuru.
Meneja wa Simba Patrick Rweyemamu amesema timu imerejea salama wachezaji wote wakiwa katika hali nzuri ambapo watakuwa na takribani siku nne kukamilisha maandalizi yao kuelekea mtanange huo wa dabi ya Kariakoo.
Libasse kaumia?
Katika hatua nyingine, uvumi unaendelea kusambaa mtandaoni kuhusu kiungo mshambuliaji Libasse Gueye taarifa zikidai alipata jeraha la kifundo cha mguu katika mchezo wa kirafiki dhidi ya Sekhukhune United.
Hata hivyo mpaka sasa hakuna taarifa yoyote ya kuthibitisha na hivyo jambo hilo kusalia kwenye 'uzushi tu'.
Libasse alishiriki mechi zote mbili za kirafiki ambazo Simba walicheza Afrika Kusini kabla ya kurejea nchini jana tayari kukamilisha sehemu ya pili ya maandalizi yake.
