Mwenyekiti wa Bodi ya Wakurugenzi klabu ya Simba Sc, Crescentius Magori pamoja na wajumbe wa Bodi, CPA Issa Masoud, Selemani Haroub na Mtendaji Mkuu wa Simba Zubeda Sakuru wamethibitisha ushiriki wao Simba Marathon Oktoba 04 2026.
Mabosi hao wa Simba tayari wamechukua vifaa vyao kushiriki wakiungana na mamia ya Wanasimba ambao wamejiandikisha kushiriki tukio hilo la kihistoria ambalo linakwenda sambamba na maadhimisho ya miaka 90 ya klabu ya Simba.
Jana Mwanariadha nyota wa Tanzania, Alphonce Simbu, alithibitisha atakuwa miongoni mwa washiriki wakubwa katika Simba Marathon 2026, itakayofanyika Jumapili, Oktoba 4, 2026, katika Ufukwe wa Coco Beach jijini Dar es Salaam.
Ushiriki wa Simbu, ambaye ni mmoja wa wanariadha mashuhuri nchini na mwenye uzoefu wa mashindano makubwa ya kimataifa, umeongeza mvuto katika mbio hizo zinazoandaliwa na Simba Sports Club ikiwa ni sehemu ya maadhimisho ya miaka 90 ya klabu hiyo.
Simba Marathon ya mwaka huu itakuwa na mbio za umbali wa kilomita 5, 10 na 21, hivyo kuwapa nafasi washiriki wenye viwango tofauti vya uwezo kushiriki katika tukio hilo.
Simbu amewahi kuiwakilisha Tanzania katika mashindano makubwa ya kimataifa, ikiwemo Boston Marathon na Michezo ya Olimpiki, jambo linalofanya uwepo wake katika mbio hizo kuwa kivutio kwa wanariadha chipukizi na mashabiki wa riadha.
