Kikosi cha Simba kinaendelea na maandalizi yake Afrika Kusini kuanza kampeni ya kukusanya alama tatu kwenye kila mchezo katika mwezi huu wa Oktoba 2026.
Miamba hiyo ya Msimbazi, chini ya Kocha Mkuu Steve Barker, inakabiliwa na mfululizo wa mechi za ndani na kimataifa zitakazoweka jaribio kubwa kwa wachezaji kutokana na ukaribu wake.
Kwa sasa, kikosi cha Wekundu wa Msimbazi kimejichimbia nchini Afrika Kusini kwa kambi maalum ya siku 10. Wakiwa huko, Simba wanapima mitambo yao kupitia mechi mbili za kirafiki dhidi ya Polokwane City na Sekhukhune United kabla ya kurejea nchini tayari kwa dabi ya Kariakoo.
Shughuli itaanza Oktoba 10, ambapo Wekundu hao wa Msimbazi watakuwa wenyeji wa watani wao wa jadi, Yanga, katika Dabi ya Kariakoo itakayopigwa kwenye Uwanja wa Uhuru jijini Dar es Salaam.
Siku tatu baada ya dabi hiyo, Simba watashuka tena dimba la Uhuru kuwakaribisha Mashujaa FC Oktoba 13.
Baada ya kumalizana na mechi hizo za ligi ya ndani, nguvu zote za Mnyama zitahamishiwa kwenye Ligi ya Mabingwa Afrika ambapo watasaka tiketi ya kutinga Hatua ya Makundi.
Simba watacheza mchezo wa kwanza wa raundi ya pili ugenini kati ya Oktoba 16–18 dhidi ya FC 15 de Agosto (Equatorial Guinea) au Fomboni FC (Comoros) kabla ya kurejea Dar es Salaam kwa mchezo wa marudiano uliopangwa kufanyika kati ya Oktoba 23–25.
Kutokana na mchezo huo wa marudiano wa CAF kuangukia wikiendi ileile ya mchezo wa Mbeya City, Bodi ya Ligi Kuu (TPLB) inatarajia kuweka kiporo mchezo huo ili kupisha mechi ya ligi ya mabingwa.
Mwezi huu utafungwa mkoani Arusha tarehe 28 Oktoba, pale Simba watakaposafiri kuwafuata Fountain Gate FC kwenye Uwanja wa Sheikh Amri Abeid.
