Pazia la ligi kuu ya Wanawake linazinduliwa kwa mechi za Ngao ya Jamii ambapo leo mechi za nusu fainali zitapigwa uwanja wa KMC Complex.
Mabingwa watetezi Simba Queens wanatarajia kuchuana na watani zao wa jadi Yanga Princess katika mchezo utakaopigwa saa 12 jioni.
Mchezo huo utatanguliwa na mchezo wa kwanza wa nusu fainali kati ya JKT Queens dhidi ya Mashujaa Queens.
Baada ya kutofanya vyema kwenye michuano ya CECAFA na kukosa tiketi ya kushiriki michuano ya ligi ya mabingwa msimu huu, Simba Queens itashuka dimbani leo ikiwa na dhamira ya kumaliza hasira za kukosa tiketi ya ligi ya mabingwa na kufungua msimu mwingine na taji.
Kwa misimu ya karibuni Simba Queens imetawala dabi ya Kariakoo kwa upande wa Wanawake, bila shaka vijana wa kocha Mussa Mgosi leo wataendeleza ubabe wao dhidi ya wapinzani wao hao.
