Shirikisho la Mpira wa Miguu Tanzania (TFF) limejaza nafasi ya Katibu Mkuu kwa kumteua Evans Mgeusa, katika mabadiliko mapya ya uongozi yaliyofanywa na Kamati ya Utendaji ya shirikisho hilo.
Uamuzi huo umefikiwa katika kikao cha Kamati ya Utendaji ya TFF kilichofanyika jijini Dar es Salaam chini ya Rais wa shirikisho hilo, Wallace Karia.
Mgeusa anachukua nafasi hiyo baada ya Oscar Mirambo, ambaye alikuwa akikaimu nafasi ya Katibu Mkuu, kuhamishiwa katika jukumu jingine ndani ya TFF.
Kabla ya uteuzi huo, Mgeusa alikuwa Mwenyekiti wa Chama cha Mpira wa Miguu Mkoa wa Njombe (NIOREFA), na sasa anakabidhiwa jukumu la kusimamia shughuli za kiutendaji za sekretarieti ya TFF.
Katika mabadiliko hayo, Mirambo ameteuliwa kuwa Naibu Katibu Mkuu na Mkurugenzi wa Maendeleo ya Mpira wa Miguu, huku Mustapha Yusuph akiteuliwa kuwa Mkurugenzi mpya wa Fedha.
TFF pia imefanya mabadiliko katika baadhi ya nafasi za wakurugenzi, ambapo Kurugenzi ya Sheria, Habari na Masoko imegawanywa na kuwa kurugenzi tatu tofauti.
Hassan Njama ameteuliwa kuwa Mkurugenzi wa Biashara na Masoko, Boniface Wambura akipewa nafasi ya Mkurugenzi wa Sheria, wakati Cliford Ndimbo ameteuliwa kuwa Mkurugenzi wa Habari na Mawasiliano.
