Mpira wa miguu si dakika 90 pekee. Wakati mwingine ni tiketi ya kuondoka kwenye maisha magumu na kuingia kwenye dunia ambayo jana ilikuwa ndoto.
Simulizi ya beki kisiki wa Simba SC, Rushine De Reuck, mpira ulikuwa zaidi ya mchezo. Ulikuwa njia yake ya kuikwepa mitaa iliyokuwa ikimeza vijana wenzake, kumtoa kwenye mazingira ya uhalifu na baadaye kumpa nafasi ya kuibadilisha familia yake.
Hii ni simulizi ya kijana aliyekulia kwenye mazingira ambayo maisha ya magenge yalikuwa karibu kuliko ndoto ya kuwa mchezaji mkubwa.
Cape Town, maisha ya mitaa na hatari zilizomzunguka
De Reuck alikulia Kalksteenfontein na Kensington, maeneo ya Cape Town ambako maisha ya mitaani hayakuwa mepesi.
Uhalifu, dawa za kulevya na magenge vilikuwa sehemu ya mazingira ambayo kijana huyo alikua akiyashuhudia.
Mbaya zaidi, hakukuwa na ulazima wa kutoka nje ya familia ili kuyaona maisha hayo. Baba yake mzazi na kaka yake mkubwa walikuwa wameingia kwenye maisha ya magenge na ujambazi.
Kwa kijana wa umri wake, huo ulikuwa mtego ambao ungeweza kumvuta wakati wowote.
Lakini De Reuck alikuwa na kitu kimoja kilichomtofautisha na wengi wa waliokuwa wakimzunguka, mpira wa miguu.
Mpira ukawa njia yake ya kutoroka
Wakati baadhi ya marafiki zake wakianza kuingia kwenye dawa za kulevya na uhalifu, De Reuck alikuwa akishikilia mpira.
Uwanja ukawa sehemu yake ya kujificha. Mazoezi yakawa ratiba yake. Ndoto ya kucheza soka la kulipwa ikawa sababu ya kutotazama nyuma.
Na leo, akisimulia safari hiyo, De Reuck hakusiti kusema ukweli ambao unaonyesha ukubwa wa nafasi ambayo mpira ulikuwa nayo kwenye maisha yake.
“Kama nisingekuwa na mpira wa miguu, kwa asilimia 100 huenda ningefuata njia tofauti. Mpira ndiyo kitu pekee kilichonifanya nibaki kwenye njia sahihi.”
Maneno hayo yana uzito kwa sababu yanatoka kwa mtu aliyeyaona mazingira hayo kwa macho yake.
Baadhi ya vijana aliokulia nao hawakufanikiwa kutoka kwenye mtego huo. Wengine walipoteza maisha, wengine wakaishia gerezani.
Kutoka mitaani hadi Mamelodi Sundowns
Safari ya De Reuck haikuwa ya kupandishwa moja kwa moja hadi kileleni. Alipambana, akajenga jina lake na hatimaye akafika kwenye Mamelodi Sundowns, moja ya klabu kubwa zaidi Afrika Kusini.
Lakini hata huko hakukuwa na maisha ya maua. Kulikuwa na nyakati za kukataliwa, kukosa nafasi ya kucheza na kusubiri fursa ambayo wakati mwingine ilionekana kama haiji. Hapo ndipo uvumilivu wake ulipopimwa.
Badala ya kukata tamaa, aliendelea kusubiri na kupambana. Mpira ulikuwa tayari umemtoa kwenye mtego wa mitaa; sasa ilibaki kwake kuhakikisha anaitumia fursa hiyo kufika mbali zaidi.
Tanzania, Simba na ukurasa mpya
Hatimaye safari yake ikamleta Tanzania. De Reuck akatua Simba SC, akiwa na kiu ya kuanza upya na kurejesha furaha yake ya kucheza soka.
Tanzania haikuwa tu kituo kingine katika maisha yake ya soka. Ilikuwa pia nafasi ya kuendelea kutimiza jambo ambalo limekuwa sehemu kubwa ya safari yake, kuisaidia familia yake.
Ndani ya Simba, akapata nafasi ya kuonyesha uwezo wake na baadaye akapewa jukumu kubwa la uongozi.
Kutoka kwenye mitaa ya Cape Town hadi kuvaa jezi ya Simba na kubeba unahodha, hii ni safari ambayo haiwezi kusimuliwa kwa takwimu za uwanjani pekee. Nyuma yake kuna historia ndefu ya kupambana.
Mafanikio yake yana maana kubwa kwa familia
De Reuck hajawahi kuificha sababu inayomsukuma. Anataka kutumia mafanikio ya soka kuhakikisha mama yake na ndugu zake wanapata maisha bora. Anatambua kwamba amefika sehemu ambayo wengi katika familia yake hawakufika. Kwa hiyo kila hatua anayopiga kwenye soka ina maana zaidi ya yeye mwenyewe.
Ujumbe kwa vijana
Historia ya De Reuck ina ujumbe mzito kwa vijana wanaokulia kwenye mazingira magumu.
Huwezi kuchagua ulipozaliwa. Huwezi kuchagua familia uliyozaliwa nayo. Huwezi pia kuamua mazingira ambayo utakutana nayo ukiwa mtoto. Lakini unaweza kupigania kile unachotaka kuwa. Kwa De Reuck, mpira ndio uliokuwa mlango huo.
Na ndio maana simulizi yake haishii kwenye kuwa mchezaji wa Simba. Inakwenda mbali zaidi, ni simulizi ya kijana aliyekuwa na kila sababu ya kupotea, lakini akapata sababu ya kupigana.
