Beki wa Simba, Nathaniel Chilambo, amesema kuitwa kwake katika kikosi cha Taifa Stars ni heshima kubwa na fursa ya kuendelea kujenga nafasi yake katika timu hiyo, huku akiahidi kupambana katika michezo ijayo ya kimataifa.
Chilambo, ambaye amekuwa katika kiwango kizuri tangu alipojiunga na Simba akitokea Azam FC, ameitwa katika kikosi cha kocha Miguel Gamondi kwa ajili ya mechi za Stars dhidi ya Guinea-Bissau na Madagascar.
Beki huyo amesema uwepo wa Stars katika maandalizi kuelekea AFCON 2027 unafanya kila mchezo kuwa muhimu, akisisitiza kuwa wachezaji hawapaswi kuingia uwanjani kwa mtazamo wa kutimiza ratiba pekee.
Amesisitiza kuwa michezo hiyo ni nafasi kwa Stars kujipima, kutafuta matokeo na pia kumsaidia Gamondi kutambua maeneo ambayo yanahitaji maboresho kabla ya fainali hizo zinazotarajiwa kufanyika Afrika Mashariki.
“Hatutakiwi kucheza kwa ajili ya kujifurahisha. Kila mchezo tunapaswa kwenda kutafuta matokeo na kuangalia tunasimamaje kuelekea mashindano makubwa yanayokuja,” alisema Chilambo.
Chilambo amesema pia michezo hiyo itawasaidia wachezaji kuifahamu zaidi falsafa ya kocha mpya na kujenga uelewano ndani ya kikosi, jambo analoliona kuwa muhimu katika maandalizi ya mashindano makubwa.
Beki huyo amesema amefurahishwa na kuitwa Stars kwa sababu ni ndoto ya kila mchezaji kuwakilisha taifa lake, huku akitambua kuwa nafasi hiyo ameipata kutokana na kiwango alichokionyesha katika klabu yake.
“Kuitwa Taifa Stars ni furaha na heshima kubwa. Ni ndoto ya kila mchezaji kupewa nafasi ya kuiwakilisha nchi yake. Nitaendelea kupambana ili niitumie vizuri nafasi hii,” alisema.
Chilambo amekuwa sehemu ya mwanzo mzuri wa Simba msimu huu na kiwango chake ndicho kilichomvutia Gamondi, ambaye amempa nafasi katika kikosi cha Stars.
Mechi hizo ni sehemu ya maandalizi ya muda mrefu kuelekea AFCON 2027, huku Tanzania ikiwa mwenyeji mwenza wa fainali hizo na tayari ikiwa na tiketi ya kushiriki mashindano hayo.
