Kiungo mshambuliaji wa Simba, Bakari Selemani Msimu, amesema hatua ya kujiunga na klabu hiyo imemfungulia nafasi ya kujifunza kwa kiwango kikubwa kutokana na ushindani uliopo ndani ya kikosi cha Wanamsimbazi.
Msimu alijiunga na Simba katika msimu huu akitokea Coastal Union, klabu iliyomlea tangu akiwa kwenye timu za vijana kabla ya kumpandisha katika kikosi cha wakubwa. Akiwa Coastal Union, alifanikiwa kufunga mabao manne katika msimu wa 2024/25 na matatu msimu uliofuata.
Licha ya kutokuwa mchezaji wa kudumu katika kikosi cha kwanza cha Simba kwa sasa, Msimu anaona hali hiyo kama sehemu ya mchakato wa kujenga uwezo wake badala ya kuwa sababu ya kukata tamaa.
Mchezaji huyo amesema mazingira anayokutana nayo Simba yamemsaidia kuongeza uelewa wake katika maeneo mbalimbali ya mchezo, hususan upande wa ufundi, mbinu pamoja na namna ya kujiandaa kupitia mazoezi.
Ametaja uwepo wa wachezaji wenye uzoefu na viwango vya juu ndani ya Simba unampa fursa ya kujifunza moja kwa moja kutoka kwa mastaa hao huku akiendelea kupigania nafasi yake.
Msimu, ambaye huu ni msimu wake wa tatu kwenye Ligi Kuu tangu alipopandishwa katika kikosi cha wakubwa, tayari amepata nafasi ya kuonekana katika michezo mitatu ya Simba msimu huu.
Alitumika kwa mara ya kwanza kwenye mchezo wa Ngao ya Jamii dhidi ya Yanga, na pia akipewa nafasi katika michezo ya ligi dhidi ya Kagera Sugar na Geita Gold.
