Baada ya ushindi wa mabao 2-0 dhidi ya Azam Fc, nyota wa Simba watakuwa na mapumziko ya siku chache kabla ya kuanza maandalizi kuelekea mchezo unaofuata dhidi ya Yanga.
Kwa sasa ligi imesimama kwa takribani wiki tatu kupisha kalenda ya FIFA ambapo pale itakaporejea, itakaribishwa na mchezo wa Dabi ya Kariakoo.
Mkufunzi wa Simba Steve Barker ameweka wazi dhamira yake ni kuona wanashinda mchezo huo akitarajiwa kutumia kipindi hiki cha mapumziko kukiandaa vyema kikosi chake.
Barker ana imani Simba itakuwa kwenye nafasi nzuri zaidi ya kushinda mchezo huo kwa sababu wachezaji wake wamezoeana wakiwa pamoja tangu msimu uliopita na wamedhihirisha kwa kufanya vyema katika mechi zilizopita ambapo kikosi kimeshinda mechi nane mfululizo kwenye mashindano yote.
"Asilimia kubwa ya wachezaji waliopo Simba walikuwepo tangu msimu uliopita, wana uzoefu mkubwa na mechi ya aina hiyo, lakini kikosi kimekuwa na mwendelezo wa kufanya vizuri, hilo linanipa nguvu ya kuamini mchezo utakuwa mzuri na tunaweza kupata pointi tatu”
“Nafahamu hautakuwa mchezo mwepesi lakini kwa sasa wachezaji wanastahili mapumziko haya machache ya FIFA ili kupumzika, kujipanga upya na kuongeza nguvu, kisha tutarudi tena uwanjani kuendeleza mapambano ya ligi,” alisema Barker
Katika kipindi hiki Simba itawakosa baadhi ya wachezaji ambao wanakwenda kwenye majukumu ya timu za Taifa.
