Kama kuna maneno yanayoweza kuelezea kiwango cha Clatous Chota Chama katika siku hizi za mwanzo wa msimu wa 2026/27, basi ni moja tu: AMEZALIWA UPYA!
Kiungo huyo mshambuliaji raia wa Zambia, anayefahamika kwa majina ya Triple C na Mwamba wa Lusaka, ameanza msimu mpya kwa kasi kubwa, akionyesha tena ubora uliomfanya kuwa mmoja wa wachezaji wanaokumbukwa zaidi katika soka la Tanzania.
Chama si tu kwamba amerudi Simba SC, bali anaonekana kurudi akiwa na kiu mpya ya kuandika historia nyingine akiwa amevalia jezi ya Wekundu wa Msimbazi.
Jana katika mchezo wa Dabi ya Mzizima uliopigwa kwenye Uwanja wa Azam Complex, Chamazi, Simba SC ilipata ushindi wa mabao 2-0 dhidi ya Azam FC.
Mchezo ulikuwa na ushindani mkubwa, lakini Simba ilionyesha utulivu na nidhamu hasa katika kipindi cha pili.
Baada ya Simba kupata bao la kwanza kufuatia beki wa Azam FC kujifunga, ilikuwa zamu ya Chama kuweka sahihi yake kwenye mchezo.
Triple C alifunga bao la pili la Simba, akihitimisha shambulizi la Wekundu wa Msimbazi na kuipa timu yake ushindi muhimu wa 2-0.
Bao hilo lilikuwa zaidi ya kuongeza idadi kwenye ubao wa matokeo; lilikuwa ujumbe mwingine kwamba Chama bado ana kitu kikubwa cha kutoa.
Msimu wa 2026/27 umeanza kwa namna tofauti kwa Chama. Mbali na uwezo wake wa kutengeneza nafasi, kupiga pasi za mwisho na kuunganisha safu ya kiungo na ushambuliaji, sasa anaonekana kuwa na kiu kubwa zaidi ya kufunga.
Katika Ligi Kuu ya NBC, Chama amefikisha mabao manne hadi sasa, huku bao lake dhidi ya Azam FC likiwa la nne msimu huu.
Hiyo ni idadi inayomweka katika mjadala wa wachezaji wanaoanza msimu kwa kasi katika upande wa ufungaji.
Afrika Pia Inamjua Chama
Katika michuano ya CAF Champions League, Chama pia ameanza kuonyesha makali yake.
Juzi, katika ushindi wa Simba wa 6-1 dhidi ya Mighty Wanderers ya Malawi, Chama alifunga mabao mawili na kuisaidia Simba kufuzu hatua iliyofuata kwa jumla ya mabao 7-1.
Mabao hayo mawili yaliongeza zaidi mwendelezo wa Chama katika michuano ya vilabu barani Afrika.
Chama amefikisha mabao 25 katika michuano ya vilabu barani Afrika, akijisogeza katika orodha ya wafungaji wenye idadi kubwa ya mabao katika historia ya mashindano hayo.
Uzoefu wambeba Chama
Kuna wakati mchezaji anapofikia hatua ambayo uzoefu wake unakuwa silaha kubwa kuliko kasi pekee. Hivyo ndivyo Chama anavyoonekana sasa.
Badala ya kutegemea nguvu au kasi, anatumia zaidi utulivu, akili ya mchezo, nafasi na uwezo wa kusoma matukio ndani ya uwanja.
Mfumo wa Simba unampa nafasi ya kucheza kwa uhuru zaidi, jambo linalomruhusu kutumia ubunifu wake na kuingia kwenye maeneo ambayo yanaweza kuleta madhara kwa wapinzani.
