FT : Simba 2-1 Mtibwa Sugar, Ngao ya Jamii yarudi Msimbazi

Simba imefanikiwa kutwaa Ngao ya Jamii kwa msimu wa pili mfululizo baada ya kuichapa Mtibwa Sugar mabao 2-1 kwenye mchezo uliopigwa katika dimba la CCM Kirumba Jumamosi jioni.



Simba iliuanza mchezo huo kwa kasi na nusura Emanuel Okwi afunge bao mapema tu kwenye dakika ya tatu baada ya shuti lake alilopia nje ya 18 kugonga mwamba wa juu na kutoka nje.

Baada ya kosakosa nyingi, Meddie Kagere aliifungia Simba bao la kuongoza kwenye dakika ya 29 akimalizia pasi murua ya kiungo aliyen'gara kwenye mchezo huo Hassani Dilunga.



Mtibwa Sugar ilisawazisha bao hilo kwenye dakika ya 33 kupitia kwa Kelvin Sabato aliyepiga shuti kali akiwa nje ya 18.

Dilunga akaifungia Simba bao la pili kwenye dakika za majeruhi kipindi cha kwanza kwa shuti kali lililomshinda mlinda lango wa Mtibwa Benedictor Tinocco.



Dilunga aliyesajiliwa na Simba akitokea Mtibwa Sugar hakushangilia bao hilo,aliomba radhi likiwa ni tukio la kiungwana kuwafanyia waajiri wake hao wa zamani.

Licha ya timu zote kushambuliana kwa zamu kwenye kipindi cha pili, ni Simba iliyofanikiwa kulinda ushindi wake na kutwaa Ngao hiyo ya jamii.



Aidha katika kipindi hicho Simba ilipata pigo baada ya mshambuliaji wake Emanuel Okwi kuumia huku nafasi yake kuchukuliwa na nahodha John Bocco.