Djuma ataka wachezaji wajitume Simba

Kaimu Kocha Mkuu wa Simba Masudi Djuma amesema msimu ujao kikosi chake hakitakuwa na nafasi kwa wachezaji wasiokuwa na msaada kwenye timu.

Akizungumza baada ya mazoezi leo asubuhi kuelekea mashindano ya Kagame Cup yanayoanza mwishoni mwa wiki, Djuma amesema mashindano hayo yatatoa nafasi kwa wachezaji kuonyesha uwezo wao.

"Mwaka huu tumesema hatutaleta mchezaji ambaye anakuja kukaa benchi na kulipwa mshahara wa bure," amesema Djuma.

"Huu ni wakati wa wachezaji kuonyesha uwezo wao. Tunataka kuwa na kikosi ambacho hatuna wasiwasi inapotokea mchezaji muhimu anaumia."

"Michuano ya kombe la Kagame haina presha kubwa. Wachezaji watakaopewa nafasi inabidi watushawishi ili tuwajumuishe kwenye kikosi."