Yanayojiri Urusi : Argentina yapenya hatua ya mtoano, yailaza Nigeria 2-1

Argentina imefanikiwa kutinga hatua ya 16 bora ya michuano ya kombe la dunia baada ya kuilaza Nigeria mabao 2-1 katika mchezo mkali uliopigwa dimba la St Petersburg Jumanne usiku.

Lionel Messi aliitanguliza Argentina kwa bao safi kwenye dakika ya 14 lakini Nigeria wakarejea mchezoni kwenye kipindi cha pili, dakika ya 51 kwa bao la mkwaju wa penati lililofungwa na Victor Mosses.

Matokeo ya sare yangetosha kuivusha Nigeria lakini beki wa Manchester United Marcos Rojo alifuta ndoto za Waafrika baada ya kuifungia Argentina bao safi kwenye dakika ya 86.

Ushindi huo umeifanya Argentina imalize nafasi ya pili kundi D ikiwa na alama nne nyuma ya Croatia iliyomaliza kileleni na alama tisa baada ya kuichapa Iceland mabao 2-1 kwenye mchezo mwingine uliopigwa sambamba.

Kwenye hatua ya 16 bora Argetina itachuana na Ufaransa iliyomaliza vinara wa kundi C licha ya kulazimishwa suluhu ya bila kufungana na Denmark kwenye mchezo wa mapema.

Croatia itamenyana na Denmark.

Nigeria imeungana na timu nyingine za Afrika, Tunisia, Morocco na Misri kuyaaga mashindano hayo na kuiacha Senagal ambayo itafahamu hatma yake keshokutwa itakapochuana na Colombia

Kesho Jumatano kutakuwa na michezi minne ya kundi E na F ambapo saa 11 jioni Mexico itachuana na Sweden wakati huohuo Ujerumani ikichuana na Korea Kusini.

Saa tatu usiku Uswisi itamenyana na Costa Rica na wakati huo huo Brazil ikipepetana na Serbia.