Simba kusajili washambuliaji wa Kimataifa

Michuano ya SportPesa Super Cup iliyomaliza kwa Gor Mahia kuhifadhi taji hilo kwa msimu wa pili mfululizo baada ya kuifunga Simba mabao 2-0 kwenye mchezo wa fainali, imeugutusha uongozi wa mabingwa hao wa Tanzania Bara na wamepanga kusajili washambuliaji wa Kimataifa.

Simba itashiriki michuano ya ligi ya mabingwa barani Afrika inayotarajiwa kuanza mwezi Disemba mwaka huu, inahitaji kuimarisha safu yake ya ushambuliaji licha ya usajili wa washambuliaji watatu uliofanyika msimu huu.

Marcel Kaheza, Adam Salamba na Mohammed Rashid waliosajiliwa na Simba hivi karibuni, walijumuishwa kwenye kikosi cha Simba kilichoshiriki michuano ya SportPesa nchini Kenya lakini walishindwa kuonyesha makali yao.

Ni Adam Salamba pekee ambaye kidogo aliongeza uhai kwenye safu ya ushambuliaji ya Simba baada ya kusafirishwa kuongeza nguvu kuanzia hatua ya nusu fainali.

Ingawa bado ni mapema, tayari kumekuwa na ukosoaji kwa usajili wa washambuliaji hao baadhi ya wadau wakikosoa usajili huo kuwa ulifanywa kwa pupa na wa kuwafurahisha mashabiki bila ya kuangalia mahitaji ya timu hasa ya michuano ya Kimataifa.

Kwani licha ya uwepo wa washambuliaji hao, Simba bado inaonekana itakuwa na wakati mgumu kwenye michuano hiyo kama itawakosa washambuliaji wake tegemeo nahodha John Bocco na Emanuel Okwi.

Bocco na Okwi hawekuwemo kwenye kikosi kilichoshiriki mashindano ya SportPesa ambayo yalimalizika bila ya Simba kufunga bao zaidi ya mikwaju ya penati.

Kwa sasa safu ya ushambuliaji ya Simba ina wachezaji watano baada ya usajili wa washambuliaji hao watatu.

Washambuliaji Laudirt Mavugo na Juma Liuzio wameachwa rasmi na mabingwa hao wa Tanzania Bara.