Manara amuwakia 'Julio' na wapinga mabadiliko wengine

Mkuu wa Idara ya Habari na Mawasiliano ya klabu ya Simba Haji Manara amewataka wanachama wa klabu hiyo wanaopinga mabadiliko kuacha tabia hiyo ya usaliti.

Manara amemtaka kocha na mchezaji wa zamani wa timu hiyo, Jamhuri Kihwelo 'Julio' pamoja na wanachama wengine wanaopinga mabadiliko ya mfumo wa uendeshaji yaliyopitishwa kuwa ni " wasaliti' kwa sababu walitakiwa kufika na kutoa maoni yao kwenye mkutano na si mahali kwingine.

Kama kuna mwanachama awe maarufu, asiwe maarufu, alipaswa aje katika kikao cha Mei 20, kukaa na kuzungumza mitandaoni kutafuta umaarufu, ...lakini inapokuja suala la Simba Sports Club, na ukaivuruga kwa dhamira yako chafu, sitakuacha, sitajali heshima yako, sitajali umri wako, kwa maslahi machafu kuja kutuchafua, nitapambana na yoyote anayezuia mabadiliko," alisema Manara.

Msemaji huyo alilazimika kumjibu Julio, baada ya kusambaa kwa sauti ya kocha huyo ikipinga uamuzi uliopitishwa wa kuendesha klabu hiyo kwa mfumo wa hisa huku akimkataa mfanyabiashara bilionea, Mohamed Dewji 'Mo' ambaye ameridhia kununua hisa asilimia 49 kwa dau la bilioni 20.

Simba tayari imefanya marekebisho ya Katiba yake na sasa tayari imeanza mchakato wa kubadili mfumo wake wa uendeshaji.