Simba yaanza mkakati wa kumbakisha Kichuya

Sio jambo la kushangaza kuona timu mbalimbali kutoka ndani na nje ya nchi zinapigana vikumbo kumuwania kiungo mshambuliaji wa simba, Shiza Kichuya.

Kiwango alichoonyesha Kichuya msimu huu kimemfanya awe na thamani kubwa na yenye manufaa kwake kama mchezaji.

Kichuya ndiye kinara wa kutengeneza mabao kwenye ligi kuu ya Vodacom akiwa amepika mabao 20 na mwenyewe kufunga saba.

Mkataba wake wa kuitumikia Simba unamalizika mwishoni mwa mwezi huu ambapo Wakala wake amesema mteja wake hayuko tayari kuanza mazungumzo ya mkataba mpya kabla wa awali haujamalizika.

Lakini taarifa za uhakika tayari mabosi wa Simba wameanza jitihada za kumbakisha kiungo huyo ambaye anahitajika sana kwenye kikosi cha Simba ambacho mwakani kitashiriki michuano ya ligi ya mabingwa.

Bilionea wa Simba, Mo Dewji ambaye atakabidhiwa timu siku chache zijazo ameapa kumbakisha mchezaji huyo kwa gharama yoyote.

Kuna taarifa kuwa Azam FC na Yanga zinamuwania Kichuya baada ya kubaini bado hajasaini mkataba mpya.

TP Mazembe ilikuwa ya kwanza kutuma ofa ya kumtaka ambayo ilikataliwa mapema na uongozi wa Simba huku vilabu kadhaa kutoka Misri na Afrika Kusini navyo vikiunga tela.

Mshambuliaji wa Everton Yanick Balasie ambaye alikuja nchini wakati timu ya Taifa ya DR Congo ilipokuja kucheza mchezo wa kirafiki na Tanzania, alimtabiria Kichuya kuwa kwa kiwango chake anaweza kusajiliwa na timu yoyote barani Ulaya.