Kichuya apanda thamani, timu kibao zamtaka

Mkataba wa Shiza Kichuya wa kuitumikia Simba unamalizika mwishoni mwa msimu huu na inaelezwa kiungo huyo amegoma kusaini mkataba mpya hadi mkataba wake wa sasa umalizike.

Simba italazimika kufanya kazi ya ziada kumshawishi Kichuya kuendelea kucheza Msimbazi msimu ujao kwani tayari kuna timu nyingi zinamuwania.

Habari za uhakika zimebainisha kuwa kuna timu kutoka nchini Algeria inamtaka Kichuya huku ikiweka mezani ofa ya mshahara wa zaidi ya Mil 20 kwa mwezi.

Kichuya anahusishwa pia kutakiwa na TP Mazembe na timu kutoka Misri na Afrika Kusini huku hapa nchini Azam FC ikielezwa kumyatia winga huyo aliye katika kiwango bora.

Mkataba wake na Simba unamalizika mwishoni mwa mwezi huu.

Wachezaji wengine ambao mikataba yao ya kuitumikia Simba inamalizika mwishoni mwa msimu ni pamoja na Mohammed Ibrahim 'Mo', Mzamiru Yassini na Said Khamis Ndemla.

Kaimu Rais wa Simba Salim Abdallah amesema klabu yake itaanza kushughulikia masuala ya usajili baada ya kujihakikishia imetwaa ubingwa.

"Kwa sasa tumeelekeza nguvu zetu zote kwenye mbio za ubingwa. Tukishamaliza hili basi tutakuwa na nafasi ya kuzungumzia masuala ya usajili."

Ligi kuu ya Vodacom inatarajiwa kumalizika May 26 2018.