Simba na Yanga uso kwa uso Morogoro

Wakati Simba ikiwa tayari mkoani Morogoro ikiendelea na maandalizi ya mchezo wa ligi kuu ya Vodacom dhidi ya Yanga, watani zao hao nao wametua mkoani humo kujiandaa na mchezo unaotarajiwa kupigwa Jumapili ijayo, April 29 2018.

Simba iliwasili Morogoro ikitokea Iringa baada ya mechi yake dhidi ya Lipuli FC wakati Yanga wametua mkoani humo jana baada ya kulazimishwa sare ya bao 1-1 na Mbeya City jijini Mbeya.

Mkuu wa Idara ya Habari na Mawasiliano wa Simba, Haji Manara, alisema kuwa timu yao imeweka kambi Morogoro na wanaamini ni mahali sahihi kwa lengo la kuwajenga wachezaji wake kuelekea mchezo huo wa Jumapili.

"Timu iko Morogoro, hali ya hewa na mazingira ya kambi ni rafiki, tunaamini benchi la ufundi litapata kile ilichokihitaji kuelekea mchezo wetu dhidi ya watani zetu," alisema Manara.

Naye Meneja wa Yanga, Hafidh Saleh, alisema kuwa kikosi cha Yanga kilitarajiwa kuwasili Morogoro jana jioni tayari kuanza mazoezi ya kuwavaa watani zao.

"Tunaenda kuweka kambi Morogoro," alisema kwa kifupi meneja huyo.

Timu hizo zitakutana huku kila upande ukiwa na kumbukumbu ya kutoka sare katika mechi ya mzunguko wa kwanza wakati Simba yenye pointi 59 ikiwa kileleni ikifuatiwa na Yanga wenye mechi mbili.