Kichuya ni moja ya 'Engine' muhimu za Simba

Shiza Ramadhani Kichuya ni mmoja wa washambuliaji wa pembeni ambaye ana kipaji cha hali ya juu. Uchezaji wake unaweza kuufananisha na ule wa winga wa zamani wa Yanga na Stars, Edibily Lunyamila.

Uwezo wake mkubwa wa kumiliki mpira na kuwatoka walinzi kwa kasi umemfanya awe tofauti sana na washambuliaji wengi wa Tanzania.

Licha ya kuwa na kikosi kipana chenye kila aina ya mchezaji, Shiza Kichuya na Emanuel Okwi hawa ndio wachezaji ambao uwepo wao dimbani utaibeba sana Simba msimu huu.

Kichuya tayari amefunga mabao mawili kwenye ligi msimu huu na mwenyewe amesisitiza anakitaka kiatu cha dhahabu licha ya kwamba bado ana kazi ya kumfikia 'Mnyama' Okwi mwenye mabao sita tayari.

Kwenye mchezo dhidi ya Mbao kichuya alipata majeraha katika kisigino chake lakini tayari ameshaanza mazoezi mepesi.

Mkuu wa Kitengo cha habari cha Simba, Haji Manara amesema atakuwa tayari kushuka dimbani kwenye mchezo ujao dhidi ya Stand United.